Sean Aquilina - Direttur u Produttur -
Id-diffikultajiet f'ħajti, qatt ma qatawli qalbi, u għalkemm il-fatti juru biċ-ċar li produzzjoni bħal din m'hix faċli sabiex tiġi prodotta, xorta waħda flimkien mat-tijm enerġetiku u entużjast dħalna għaliha bi ħġarna. Tagħna f'tagħna hu l-programm fejn min iħobb l-arti varja kif ukoll jissaportja t-talent kollu lokali, żgur m'għandux jitlef l-appuntament magħna, kull nhar ta' Ħadd fil-17:15. Inħossni ixxurtjat li minkejja l-eta' żagħżugħa, studju u xogħol li naffaċjaw ta' kuljum, xorta żammejna f'moħħna dak li emminna fih mill-bidu nett u pass pass wasalna ukoll għall-ġurnata tant mistennija, dik ta' 3 t'April. Il-fatt li tkun student mhux dejjem hi vantaġġ, speċjalment meta ħafna elementi jinsagħbu kontrik, biss l-ebda torri ma ttella' fi ftit siegħat, b'daqsxejn ta' paċenzja u dedikazzjoni, kulħadd kapaċi jilħaq dak il-livell tant mixtieq. Nixtieq pubblikament nirringrazzja lit-tijm kollu li minkejja li tijm ġdid u ċkejken, xorta wera l-imħabba lejn dan il-qasam kif ukoll l-entużjażmu li proġett bħal dan jasal kif għandu jkun. B'hekk nirringrazzja lill-kollegi tiegħi, kif ukoll lil Nicolai u Jesmond flimkien mal-familjari li mingħajrhom żgur ma nmiddu l-ebda pass. Esperjenza indimentikabbli li ċertament tinkuraġina nwasslu produzzjonjiet oħra l-quddiem.

Charles Falzon - Maniġer tal-produzzjoni -
Ferħan li t-team; New Productions aċċetta l-isem tal-programm 'Tagħna f’Tagħna' li kien idea tiegħi, minħabba l-fatt li l-idea prinċiparja kienet li nippromwovu artisti Maltin ta' kull eta' fejn flimkien naqsmu l-esperjenzi u naprezzaw it-talent f'xogħolhom, lokalitajiet Maltin li ngħaddu frekwentament minn ħdejhom u qajla nagħtu kas li qegħdin hemm minkejja l-storja interessanti li jġibu magħhom, u ikel bnien tradizzjonali Malti , b'hekk la darba kollox hu kulturalment Malti, kollox hu tagħna f’tagħna. Esperjenza sabiħa ħafna li tinvolvi ħafna xogħol, sfidi u sagriffiċji, imma meta tara l-prodott finali sewwa sew kif immaġinajtu fil-fażi inizjali, toħroġ kuntent ħafna. Din kienet l-ewwel esperjenza tiegħi bħala production manager u nista' ngħid li ninsab kburi li qiegħed f’tijm tajjeb ħafna, għalkemm jien l-ikbar wieħed, sħabi jimlewni b'enerġija li lkoll flimkien inżommu r-rota 'ddur.

Anthony M. Baldacchino - Kittieb -
Dak inhar li l-programm ġie ikkonfermat għal fuq it-televżjoni kont qiegħed funeral ta' persuna li tant issaportjani fit-talent tiegħi f'dan il-qasam, u għalhekk ma nistax ma nsemmiehx; s-surmast tal-iskola sekondarja. Tagħna f’Tagħna għalija hu avventura sħieħa! F’dawn it-tlettax il-ġimgħa ser nistħarrġu dwar arti differenti, kontemporanja... Kieku ma kienx għal dan il-programm, arti ghalija għadha tfisser biss Tpinġija, pero hemm ħafna aktar! Ħaġa oħra li tevolvi matul din l-iskeda, li għalkemm Malta żgħira, xorta waħda it-talent hu enormi u l-artisti lokali huma kapaċi għal kull tip ta' xogħol artistiku li se narawh flimkien fuq Tagħna f’Tagħna! ..

Ryan Darmanin - Preżentatur -
Esperjenza li m’jien se ninsija qatt!! Żgur li mhux se tkun l-ewwel u ta’ l-aħħar...
L-ewwel darba li affaċjani Sean, ħsibtha ċajta. Minn dejjem xtaqt nieħu sehem fi programm televiżiv, iżda qatt ma kelli l-kuraġġ nipparteċipa f'auditions. Minn ċkuniti kont involut f'tejatrini għall-palk, iżda il-qabża minn xogħol ta' palk għal dak televiżiv hi waħda kbira. Meta irrejalizzajt li jien se nkun wieħed mill-uċuħ prominenti ta’ dan il-programm, sibtha iżjed diffiċli, iżda grazzi għal ħafna ħbieb f'dal qasam tal-media u s-support tal-familja, nagħmel l-għalmu tiegħi u flimkien mat-tijm żagħżugħ li tant naqblu flimkien, ntellaw xogħol ta' livell li lkoll kuntenti ħafna bih. Xogħol li bih niltaqgħu ma' l-interess tal-udjenza u nelaboraw it-talent Malti li hu tant kbir u vast.

Jackie Vassallo Bianchi - Preżentatriċi -
Wiċċ familjari ma' min isegwi d-drama Maltija, hu dak ta’ l-attrici stabbilita', Jackie Vassallo Bianchi. Din se tkun qed tippreżenta l-programm flimkien ma' Ryan Darmanin.
Il-Programm Tagħna f’tagħna, għalija kienet sfida ġdida, għax din hija l-ewwel esperjenza tiegħi bħala preżentatriċi televiżiva. Is-suġġetti li se jitratta dan il-programm huma suggetti kulturali u edukattivi u għalhekk ninsab komda, appuntu għaliex dawn huma suġġetti ferm għal qalbi.

Michael Mifsud - Leħen fis-sezzjoni tal-attrazzjonijiet Maltin -

Niftakar meta avviċinani Charles Falzon biex nagħti sehemi  għal dawn il-features aċċettajt mill-ewwel, l-ewwel net għax jien nieħu gost fejn tidħol id-drama u iżjed u iżjed minħabba l-ġeneru  tas-suġġett. Ħadt gost ukoll li l-produzzjoni kienet se tkun maħduma kollha minn element żagħżugħ. Lil xi wħud mill-produtturi, kont diġa ltqajt magħhom allura stajt inkun ftit aktar komdu meta ġejna biex nibdew x-xogħol. Charles kien jibgħatli l-iscripts b'imejl u nippreparhom billi naqrahom tlieta u anke ġieli erba' darbiet u wara niltaqa' mal-producer biex jibda r-recording. Jien kull meta nieħu sehem f'xi produzzjoni dejjem nitgħallem minn min ikun qed jidderiġi u f'dan il-każ ġara hekk wkoll għax Sean urieni direzzjoni tajba kif għandi nanima dawn l-istess features. 

Għaldaqstant, jien kuntent ħafna għal mod kif sar ix-xogħol fejn kien hemm analiżi dettaljat għal dak kollu li sar f''din il-produzzjoni li jien inqisha waħda professjonali u li għandha tintlaqa' tajjeb ħafna minn dawk li jsegwuha.